Thoes

Moandagmörgen-leegte
Opdroagen aan Dick Nanninga

De weke begunt
Alderdeegs nog veurdat
t Kwoad wakker worden is.

Wel wait kin tussen
De vougen van zundagmörgen
En de moandagmörgen-leegte

Goudoardeg kruud opsloagen
Dat gain mins meer

Waiden huift.

(Inspireerd op De Lange, de biografie van Dick Nanninga, deur Jeroen Siebelink)



Bevrijden

Wat meugelk is:
Doe kinst de mens
Tou t baist oethoalen

Op wèl e liekt,
Woar hai zien
Oorsprong in het.

Mor, hou roar t ook klinken mag:
t Baist tou de mens oethoalen –

Hou haard dastoe dat
Ook pebaaierst –

t Zel die nait lukken,
Omreden dat t baist
Ien de mens bestijt,

En veur aaltied en aiweg
Bestoan blieven zel.

(Inspiroatsie: De grom uit de hond halen, Iduna Paalman.)



Wat laifde is

Wat laifde is, vragstoe – Din zeg ik die, dat
Laifde is dat ik die
Droagen wil,

Dat ik die onveurwoardelk droagen wil
Op de toppen van mien vingers
Zo laang as ik leef,

Din droag ik die verder
Dan dastoe oeit droagen bist,

Wieder nog as de horizon
Doar huil ien de verte.

Bert Weggemans



Dat je t waiten

Dit is nou ais gain broodje oap.
Ik zeg t joe liek veur de roap:
ons laand is tiedelk goud op slöt.
Aan ain kaant veur mie nait zo röt,
din kin ik mooi even in wintersloap.



Mout t nou zo?

t Grunneger landschop wordt aal meer om van te grienen.
Aalderwegens wordt t volpoot mit dij lèlke windturbinen.
Deur dij hoge poalen verdwient t landschoppelk oetzicht.
En bie duustern woan je joe zowat bie kermislicht.
Mor paartie lu zeggen: ‘wíj moeten goed verdienen!’



Op zuik noar n nij woord

Aingoal op zuik noar dat aine woord,
woarvan nog gainain t bestoan kent.
Dij in zien aigenhaid elkenain bekoort,
en woarin elk zien gevuilens herkent.

Mien daipste daipten heb ik aanboord,
en mien geest waarkde zok in t zwait.
Gain woord nog deur de gedachtenpoort.
Aal meer twievels of zo’n woord bestaait.

Zo’n woord mout toch kinnen bestoan,
ain woarin alles ligt besloten.
Dus mor wieder groaven goan,
want oet laifde is ook veul ontsproten.

Trijnko Pelgrim



n Laid veur moeke

Ik wil per se begriepen
wat mien aigen kind bedoult

zee ze en haar t stoer mit mien gedicht
n verbeten trek op heur gezicht

k wos t nait mor bezörgde heur verdrait
vandoage schrief k veur moeke n vrolek laid



Kinst nog lagen

Wat swoare luchten
duustere tieden
veuruutzicht is der nait

kinst nog lagen toch
om t vogelmannechie
dij in geude van dak
de laifde bedrift
mit t vogelvraauwchie
van wereldzörgen gain wait

wat swoare luchten
duustere tieden
veuruutzicht is der nait

kiek ze baauwen
nait raauwen
n vlaigerij
mit snoaveltje
vol takjederij
wat ja n waarkzoamhaid

wat swoare luchten
duustere tieden
veuruutzicht is der nait

laag doe mor even
noar hail dit leven
en om dien aigen onneuzelhaid.

Henk Puister



Weersverwachten

Mörn gliddern wie mit nkander
- zunder gas en stoareg aan -
aaltmoal weerom ien zee
allenneg wierden blieven stoan.

Nelleke van Vliet



Toukomst

t Was as vanolds
ales was net zo bleven
huifde weg nait vroagen
aal was nog bekend

gain hoezen verswonnen
ook nijen biebaauwd nait
ol schoul ston der nog aaid
wat aans haar doar nooit kind

bekenden trof k ter nait
gainent dij mie nog wat zee
lu laipen hoasteg wieder
vroagen stèlde k ook nait

ien dat dörp
vuilde k mie nait meer thoes
t was ol stee nait meer
k dochde t bloots mor zo

blied nou dat k doar
nait meer thoes heuren dou
goa k verlöst wieder aan loop
toukomst ien en dij komt nou

Nane van der Molen



Widde snij, wat aaldoags wodder is

vogel vlugt dwaars deur snijbui vot
zun opzuiken dat mout e
mien laive tied, k mout nog
zo veul kilometers veur dat k
bie mien palmboom bin
gain èlf steden mor wel doezend

kat zakt deur snij, poten nait meer te zain
het muite om der oet te kommen
daaier kikt om zok tou
hai het lopen op regenwodder
widde snijkloeten krekt ies
n elfstedenraais veur daaier

man mit camera aan haals
mit zien hond dij t nait op poten holt
snij mit ies derbie, zol t woarhaid weden
elfstedentocht? petretten?
ies eefkes ontkommen,
doar liggen man en camera

lu binnen aan loop mit wodder
op iesboan, mit n rooie streep,
scheuvels oet vet, din op boan
rooie streep is nait haildaal
liek oet liek aan, dat dut ja niks
wedstrieden, èlf moal iesboan inom

bie mie in stroat n man dij noeit snij
zain het, swaart as nacht is hai
wit as snij van grode kèlleghaid
donten snij as manna oet hemel
dikke snijbui dij as n klaid op stee ligt
eefkes loader, wis woar, k heb t bewies ‘swaart op wit’

mor din n tak mit schiere bladjes
zol t overleven? èlf stroalen zun
veur zo'n klaain gruin takje
doezend stroalen zun
din is der n begun
aanloop is der ja, doar mouten wie t mit doun

Anna de Vries-Maarhuis



Wacht even

Even stilstoan
ien de tied
dij lopt en tikt en runt,
genieten
van dit mooi mement
ien Gods rieke scheppenspracht,
n blik op wat begunt.

Even stilstoan
ien Zien riek
dat hier al is te zain
ien n moment van stilte,
met Hom
bist noeit allain.

Coby Poelman-Duisterwinkel



Poaske is de nije Kerst

t Was n maal joar
t Gewone leven lag op zien gat
t Vuilde zo roar
t Was zo stil in Ommelaand en Stad
Zoveul lu waren ainzoam
En verloren ale moud
Mor as wie meer om nkander denken
Den komt t aal goud

Nou komt weer n tied
Dat we bie nkander binnen
Wie vuilden ons zo bepaarkt
Mor goan weer de vrijhaid vinden
De grode wereld ligt weer open
En wie kriegen weer goie zin
Zo as Jezus opston oet de dood
Komt de wereld weer in t ìnd
Ook op anderhaalve meter
Bin ik nait wied vot van die
Loat de òfstaand klaainer worden van die noar mie

En wie zitten mit nkander
Bie de poaskeboom
Dailen ons poaskestoet mit lu dij noast ons stoan
Zo kriegen wie de kop derveur
En geven ons bosschop deur
Poaske is de nije Kerst dit joar

Mit de Kerst konden wie nait bie nkander wezen
Mit de Poaske mout t den mor wezen
Poaske is de nije Kerst dit joar

Hest t al heurd?
Geef t deur
Hest t al heurd?
Poaske is de nije Kerst

Hest t al heurd?
Poaske is de nije Kerst
Geef t deur
Poaske is de nije Kerst [5x]

Bert Wijnholds
Noar: Do They Know It's Christmas? – Band Aid
Orig. tekst: Bob Geldof, Midge Ure

Veul artiesten schienen t neudeg te vinden om kerstnummers, of zulfs haile albums vol, op te nemen. Mor het ooit al n artiest docht aan n poaskenummer? Nait dat ik wait, dus heb k zulf mor aine schreven. Op t mement van schrieven was dit meschain wat optimistisch, hopelk is der rond de Poaske uutzicht op verbetern.