Thoes
Fré Meis


n Tovve kommunist. Nait allènt veur de kartonaarbaiders in Pekel, mor veuraal ook in zien benoadern tot aander lu. In zien tied ree e in n Audi 60, n zaandkleurege. Nait bepoald n kommunistisch karrechie!
Ik kwam hom tegen bie d'benzinepompe van n 'geriffemeerde' aigenoar. Mien gedachten doarover dee mie vroagen noar zien tankgedrag en zien chique kare … 'Is dat nait wat krom veur n kommunist?' wol k van hom waiten.
'Wie mouten mit mekoar de wereld deur, mien jong! Dizze man mout ook leven en n kommunist krigt ook last van zien rogge in n Trabantje. Omdat ik veul kilometers moak, Grunnen-Den Hoag en weerom, mag ik dizze kare broeken van de pertij.'
Hai het geliek, docht ik en gunde hom zien Audi.
De oetslag van zien inzet veur de kartonaarbaiders is bekend … zien standbeeld meer as terecht! De loonsverhogen dij hai der veur t volk oetsleepte was nait mis.
Ondanks dat Fré veur de Pekelders n òfgod wuir, was der ook veul teleurstellen. Teleurstellen in de vakbond woaras zai bie aansloten wazzen, en aait docht haren dat dij veur heur traauwe leden opkommen zol. Joaren achter mekoar kwam der n vakbondsman mit de directie onderhandeln over 'n beetje meer'. Elke bod was t den: 'Sorry, de tegenvallende resultaten staan geen verhogingen toe!' Mit n vlèzze draank en n dikke segoare in de mond gingen ze de der den rap vandeur. 'Binnen dij der nou veur ons? Of speulen ze onder ain houdje mit de directie?' Nee, den Fré … n kommunist mit n grode bek. n Kerel, dij vocht veur zien volk … wel of gain lid van zien pertij. Onrecht, doar ging t om en dat mos ais òflopen wezen!

In de joaren zesteg wuir ons hoes-an-hoes-bladje Mau-Mau vergees in dizze regionen verspraaid. Bie binnenkomst en t òfgeven van n stoapel kranten, zag ik de bezörger mit d'handen onder kop zitten te schraiven. 'Wat is dit? Ie kriegen n fikse loonsverhogen en toch janken?' vroug ik.
'Joa,' zee zien vraauw, 'hai kin mor nait begriepen, dat zo'n staarke bond niks veur nkander kreeg en Fré opains wel. Hai vuilt zok zwoar beloazerd!'

t Standbeeld van Fré Meis staait nou al joaren stoer in Pekel. Haar de vakbond nait zo laks west, den was t beeld der noeit kommen. Nou, noa zesteg joar, bliekt dat de bonden muite hebben te bestoan. Zol der n verband wezen?


Klaas van Zonneveld